تجهيز البيت لاستقبال شهر رمضان

إزاي ممكن نحتفظ باللحوم والخضراوات اللي هنشتريها في الثلاجة بطريقة تسهّل علينا استخدامها بعد كده؟

أحسن حاجة إننا نشيلهم جاهزين على الاستخدام على طول؛ يعني مثلاً ممكن الفراخ البانيه نجيبها ونشيلها متّبلة جاهزة، ولو هنجيب فراخ صحيحة علشان نشويها، ممكن برده نغسلها كويس، ونتبّلها بالتتبيلة اللي إحنا عايزينها، وبعد كده نشيلها في الفريزر، ويبقى كده إحنا وفّرنا وقت لو هنستخدمها في أي عزومة، ممكن نطّلعها على الشوي، أو نحط معاها الخضار، وندّخلها في الفرن، ونفس الكلام ممكن نعمله مع اللحوم والأسماك.

لو عايزة تعرفي بالتفصيل إزاي تخزّني اللحوم في الثلاجة.. اضغطي هنا

طيب بالنسبة للخضراوات.. إزاي نخزّنها؟

بالنسبة للخضراوات؛ فأنت ممكن تحفظيها نيّة، أو تسوّيها وتشيليها جاهزة في الفريزر، بس ده في حالة إنك يكون عندك عزومة قريبة، وعايزة توفّري على نفسك وقت في يوم العزومة؛ فممكن تعملي أصناف الخضار اللي أنت عايزاها وتشيليها في الفريزر، وتطلّعيها على التسخين في يوم العزومة.

لو عايزة تعرفي بالتفصيل إزاي تخزّني الخضراوات في الثلاجة.. اضغطي هنا

إيه تاني ممكن نخزّنه في الفريزر، ويكون جاهز على التسوية على طول؟

تقدري تجهزي صينية المكرونة بالبشاميل، واللي بتكون موجودة دايما في معظم العزومات، وتشيليها جاهزة في الفريزر من قبل العزومة بيوم، وتطلّعيها على التسخين على طول في يوم العزومة.

كمان النواشف والمعجّنات؛ زي السمبوسك والقطايف، كل ده ممكن نحضّره ونشيله في الفريزر، طبعاً القطايف أول ما نجيبها لازم نحشيها؛ لأنها ممكن تنشف لو سيبناها ومش هنعرف نحشيها بعد كده؛ بس ما ننساش لما نيجي نشيل الحاجات دي في الفريزر إننا نحط على كل كيس ورقة مكتوب عليها نوع الحشو اللي موجود في الكيس ده.

من الحاجات كمان اللي ممكن نحضّرها ونشيلها في الفريزر كفتة الرز؛ بحيث إننا نطّلعها على القلي بس، أو ممكن نشيلها مقلية وتبقى جاهزة إنها تتطلع يتعمل لها الصوص بتاعها الأحمر وأحطّها فيه، يعني الاختيارات كتير لو عندي عزومة أحضّر لها من بدري.

لو عايزة تعرفي بالتفصيل إزاي تخزّني السمبوسك والكنافة والقطايف.. اضغطي هنا


ممكن نخزّن العصاير اللي بنستخدمها في شهر رمضان علشان تبقى جاهزة على التقديم
ممكن نخزّن العصاير اللي بنستخدمها في شهر رمضان علشان تبقى جاهزة على التقديم

هل المشروبات ممكن نخزّنها في الفريزر؟

لو فيه مكان في الفريزر ممكن طبعاً إننا نخزّن العصاير اللي بنستخدمها في شهر رمضان؛ بحيث إنها تبقى جاهزة على التقديم؛ زي: قمر الدين، والكركديه، والتمر الهندي.

لو عايزة تعرفي بالتفصيل إزاي تخزّني عصاير رمضان.. اضغطي هنا

من المشكلات اللي بتقابلها ست البيت مع خزين رمضان في فصل الصيف، النمل، إزاي نتعامل مع المشكلة دي؟

ستات كتير فعلاً بتعاني من المشكلة دي، وكتير بيقولوا لي: "أنا عملت كل حاجة وبرده النمل بيرجع تاني".

الحل إننا نشوف أصل المشكلة إيه، مش بس ندوّر على علاج؛ لأن زي ما بيقولوا: الوقاية خير من العلاج، ودايماً باقول: طالما فيه نمل بيظهر يبقى أكيد فيه حاجة طالع يدوّر عليها، ولو البيت مافيهوش فتافيت ومافيش أكل مكشوف، يبقى النمل مش هيطلع.

علشان كده لازم أراعي دايماً إني لو عاملة كيكة مثلاً، أشيلها في علبة مقفولة ومتغطّية، وأحُطّها في التلاجة.

وكمان الحاجات اللي مش بتتشال في الثلاجة والنمل ممكن ييجي عليها زي السكر والمكرونة، لازم أحطّهم في مكان مقفول كويس أو في علب بلاستيك، ولو عندي مكان في درج الثلاجة ممكن أحطّهم فيها.

من الحاجات المهمة كمان، إننا نهتم جداً بتنظيف المطبخ بعد تحضير الأكل، وإننا نغسل البوتاجاز، ومانسيبش أي مواعين في الحوض.

ومش لازم ننسى إننا نطّلع سلة المهملات بره البيت كل يوم أو يومين بالكتير، وأهم حاجة إن أكياس القمامة تبقى مقفولة كويس ومرشوشة، وممكن نحطّ على كيس القمامة نقطة أو نقطتين فينيك علشان الحشرات والذباب ما يتلمّش عليهم.

خلاص كلها كام يوم ويبدأ رمضان.. وطبعاً الجو حر جداً اليومين دول، إزاي ممكن نتعامل مع المشكلة دي؟

لازم نهتم جداً بتهوية البيت، ولازم أبقى عارفة كويس المنافذ اللي في البيت اللي بتدخل هوا كويس، وأفتحها، وإيه المكان اللي بيدخّل شمس جامدة، ونحافظ على إننا نبقى قافلينه دايماً طول النهار؛ لأن البيت بيحتفظ بالحرارة بتاعة الشمس طول اليوم.

ويا سلام لو صحيتِ على الفجر فتّحت الشبابيك؛ علشان الهواء الجميل والنظيف ده يدخل البيت، وكمان تفتّح الشبابيك على المغرب، بعد ما الشمس تروح، وبكده البيت هيبقى الجو فيه أفضل بكتير، ومن غير ما نستهلك التكييف أو المراوح طول اليوم.

وطبعاً مش هاقول للناس: بلاش تستخدموا التكييف؛ بس نحاول نقلل من عدد ساعات استخدامه علشان نوفّر في الكهرباء، وكمان بلاش نفتح تكييفين مع بعض في نفس الوقت.

وكمان نراعي إن درجة حرارة التكييف تكون مناسبة مع الغرفة بما يسمح إن التكييف يفصل شوية، والترموستات تشتغل، علشان التكييف ما يبقاش شغال سحب كهرباء على طول..

وفي النهاية عايزة أفكركم إننا لازم نهتم جداً بتزيين البيت لاستقبال شهر رمضان، وإننا نتمتّع ببهجة وزينة الشهر الكريم، وتعليق الفوانيس، ووضع مفارش الخيامية؛ علشان ندّي لبيتنا طابع خاص ومميّز في رمضان..